Якім быць новаму шматпалярнаму свету, які кардынальна мяняецца на нашых вачах? У амерыканскім грамадстве сур'ёзна пахіснулася ідэя аб шматбаковым супрацоўніцтве ЗША, паведамілі ў праграме Навіны «24 гадзіны» на СТБ.
Рэспубліканцы ўнеслі законапраект пра поўны выхад краіны з ААН. Аўтары дакумента патрабуюць спыніць членства і фінансаванне арганізацыі, абвінаваціўшы яе ў падрыве амерыканскіх каштоўнасцей і падтрымцы сапернікаў ЗША.
Член Палаты прадстаўнікоў ЗША Чып Рой павінен сёння прадставіць гэты законапраект у ніжняй палаце заканадаўчага органа. Так, дэпутаты сцвярджаюць, што ААН не здолела пазбегчы войнаў, генацыдаў і парушэнняў праў чалавека, нягледзячы на мільярдныя ўліванні амерыканскіх падаткоўцаў. Рэспубліканцы таксама ўпэўнены, што ААН ператварылася ў карумпіраваную платформу для тыранаў і месца для нападак на Амерыку.
Дэпутаты настойваюць на прыярытэце рэальных альянсаў, што гарантуюць бяспеку. А гэта ўжо з'яўляецца сур'ёзнай заявай, якая прымусіць ААН зацягнуць паясы, або зусім знікнуць з радараў міжнароднай арэны. Нагадаем, ЗША былі і ёсць найбуйнейшым фундатарам ААН, ахвяруючы больш за 18 мільярдаў даляраў у год, што складае траціну ўсяго бюджэту арганізацыі. Спробы скараціць фінансаванне распачыналіся яшчэ адміністрацыяй Трампа падчас яго першага тэрміну. Раней лідар ЗША падпісаў указ пра выхад краiны з Савета ААН па правах чалавека.
